'ലിവര്‍പൂളില്‍ ഇതെന്‍റെ അവസാണ സീസണ്‍'; വലിയ സൂചന നല്‍കി മുഹമ്മദ് സലാഹ്
കരാർപുതുക്കുന്നതിനെക്കുറിച്ച് ക്ലബ് മാനേജ്മെന്‍റ് തന്നോട് സംസാരിച്ചിട്ടില്ലെന്ന് സൂപ്പര്‍ താരം
Update: 2024-09-02 10:53 GMT
ഇത് ലിവര്‍പൂളിനൊപ്പമുള്ള തന്‍റെ അവസാന സീസണായിരിക്കുമെന്ന സൂചന നല്‍കി ഈജിപ്ഷ്യന്‍ സൂപ്പര്‍ താരം മുഹമ്മദ് സലാഹ്. കരാര്‍ പുതുക്കുന്നതിനെ കുറിച്ച് ക്ലബ്ബ് മാനേജ്മെന്‍റ് ഇത് വരെ തന്നോട് സംസാരിച്ചിട്ടില്ലെന്ന് സലാഹ് വ്യക്തമാക്കി.
“കരാർ പുതുക്കുന്നതിനെക്കുറിച്ച് ക്ലബ് മാനേജ്മെന്റിലുള്ള ആരും എന്നോട് ഇതുവരെ സംസാരിച്ചിട്ടില്ല. അതുകൊണ്ട് ലിവർപൂളിനൊപ്പം ഇതെന്‍റെ അവസാന സീസണായിരിക്കും. കാര്യങ്ങൾ എന്റെ നിയന്ത്രണത്തിലല്ല”- സലാഹ് പറഞ്ഞു. എന്നാല്‍ സലാഹിന്‍റെ നിലവിലെ പ്രകടനത്തില്‍ താന്‍ സംതൃപ്തനാണെന്നും കരാറിനെക്കുറിച്ച് തനിക്കൊന്നും അറിയില്ലെന്നും ലിവര്‍പൂള്‍ കോച്ച് അര്‍നേ സ്ലോട്ട് പ്രതികരിച്ചു.
“ഈ നിമിഷത്തിൽ സലാഹ് ലിവർപൂൾ താരമാണ്. അതിലെനിക്ക് അതിയായ സന്തോഷമുണ്ട്. യുണൈറ്റഡിനെതിരെ മികച്ച പ്രകടനമാണ് സലാഹ് കാഴ്ചവെച്ചത്. കരാറിനെക്കുറിച്ച് എനിക്കൊന്നും സംസാരിക്കാനില്ല''- സ്ലോട്ട് പറഞ്ഞു. ഈ സീസണിലും ലിവര്‍പൂളിനൊപ്പം മിന്നും ഫോമിലാണ് സലാഹ്. കഴിഞ്ഞ ദിവസം മാഞ്ചസ്റ്റര്‍ യുണൈറ്റഡിനെ ഓള്‍ഡ് ട്രാഫോഡില്‍ വച്ച് എതിരില്ലാത്ത മൂന്ന് ഗോളിന് ലിവര്‍പൂള്‍ തകര്‍ക്കുമ്പോള്‍ ഒരു ഗോള്‍ സലാഹിന്‍റെ വകയായിരുന്നു.