കുവൈത്തില്‍ വിരലടയാള പഞ്ചിങ്ങിനെതിരെ എതിർപ്പ്​ തുടരുന്നു

ജീവനക്കാർ സമയനിഷ്ഠ പാലിക്കുന്നുണ്ടെന്ന്​ ഉറപ്പുവരുത്താൻ വിരലടയാള പഞ്ചിങ്​ നിർബന്ധമാക്കി കുവൈത്ത്​ സിവിൽ സർവീസ്​ കമീഷൻ (സി.എസ്​.സി) പുറപ്പെടുവിച്ച ഉത്തരവിനെയാണ്​ ചില എം.പിമാരും ഉദ്യോഗസ്ഥരും എതിർക്കുന്നത്

കുവൈത്തിലെ പൊതു മേഖലയിൽ ഒക്ടോബർ ഒന്ന്​ മുതൽ നടപ്പാക്കുന്ന വിരലടയാള പഞ്ചിങ്ങിനെതിരെ എതിർപ്പ്​ തുടരുന്നു. ജീവനക്കാർ സമയനിഷ്ഠ പാലിക്കുന്നുണ്ടെന്ന്​ ഉറപ്പുവരുത്താൻ വിരലടയാള പഞ്ചിങ്​ നിർബന്ധമാക്കി കുവൈത്ത്​ സിവിൽ സർവീസ്​ കമീഷൻ (സി.എസ്​.സി) പുറപ്പെടുവിച്ച ഉത്തരവിനെയാണ്​ ചില എം.പിമാരും ഉദ്യോഗസ്ഥരും എതിർക്കുന്നത്​. അതേസമയം, മന്ത്രാലയങ്ങൾ, സർക്കാർ വകുപ്പുകൾ, പൊതു സ്ഥാപനങ്ങൾ എന്നിവ ഉത്തരവ്​ നടപ്പാക്കാനുള്ള എല്ലാ ഒരുക്കങ്ങളും പൂർത്തിയാക്കിയിട്ടുണ്ട്​.

വിരലടയാള പഞ്ചിങ്​ പോലുള്ള കാര്യങ്ങളിലല്ലാതെ കുവൈത്ത്​ സിവിൽ സർവീസ്​ കമീഷൻ (സി.എസ്​.സി) സുപ്രധാന വിഷയങ്ങളിൽ ശ്രദ്ധ പതിപ്പിക്കണമെന്ന്​ എം.പിമാർ ആവശ്യപ്പെട്ടിട്ടുണ്ട്​. ജീവനക്കാരും അവരുടെ ജോലി സ്​ഥലവും തമ്മിലുള്ള ബന്ധം വിശ്വാസത്തെയും ഉൽപാദനക്ഷമതയെയും അടിസ്​ഥാനമാക്കിയുള്ളതാണ്​. വിരലടയാള പഞ്ചിങ്​ വിശ്വാസരാഹിത്യത്തെയാണ്​ അടയാളപ്പെടുത്തുന്നതെന്നും സംവിധാനത്തെ എതിർക്കുന്ന എം.പിമാർ പറഞ്ഞു.

തങ്ങളുടെ ജോലിമേഖലക്ക്​ അനുയോജ്യമല്ല വിരലടയാള പഞ്ചിങ്​ സംവിധാനമെന്നാണ്​ ഡോക്​ടർമാരും എൻജിനീയർമാരും വാദിക്കുന്നത്​. പഞ്ചിങ്​ സംവിധാനം നടപ്പാക്കിയാൽ റോഡിലെ ഗതാഗതക്കുരുക്ക്​ വർധിക്കുമെന്ന്​ കുവൈത്തി ട്രാഫിക്​ സേഫ്​റ്റി സൊസൈറ്റി മുന്നറിയിപ്പ്​ നൽകിയിട്ടുണ്ട്.