"ഉത്തർ പ്രദേശിൽ 20 മുസ്‌ലിം സ്ഥാനാർഥികളെയെങ്കിലും മത്സരിപ്പിക്കൂ" ബി.ജെ.പിയോട് ന്യൂനപക്ഷ മോർച്ച
മുസ്‌ലിം ജനസംഖ്യ 30 ശതമാനത്തിലേറെയുള്ള നൂറ് സീറ്റുകൾ തങ്ങൾ കണ്ടെത്തിയിട്ടുണ്ടെന്ന് ന്യൂനപക്ഷ മോർച്ച അധ്യക്ഷൻ ജമാൽ സിദ്ദിഖി പറഞ്ഞു
Update: 2022-01-11 11:42 GMT
ഉത്തർ പ്രദേശിൽ നടക്കാനിരിക്കുന്ന നിയമസഭാ തെരഞ്ഞെടുപ്പിൽ കുറഞ്ഞത് 20 മുസ്‌ലിം സ്ഥാനാർഥികളെ എങ്കിലും രംഗത്തിറക്കിണമെന്ന് ബി.ജെ.പി കേന്ദ്ര നേതൃത്വത്തോട് ന്യൂനപക്ഷ മോർച്ച. 2017 നടന്ന തെരഞ്ഞെടുപ്പിൽ പാർട്ടിക്ക് ഒരു മുസ്‌ലിം സ്ഥാനാർഥി പോലുമുണ്ടായില്ല.
" മുസ്‌ലിം ജനസംഖ്യ നിർണായകമായ പല മണ്ഡലങ്ങളുണ്ട്. പലയിടത്തും ഞങ്ങൾ തോറ്റത് നേരിയ മാർജിനിലാണ്. സമ്പൽ, മൊറാദാബാദ്, മീററ്റ് തുടങ്ങിയ മണ്ഡലങ്ങളിൽ മുസ്‌ലിം വോട്ടർമാരാണ് കൂടുതൽ" - ന്യൂനപക്ഷ മോർച്ച അധ്യക്ഷൻ ജമാൽ സിദ്ദിഖി പറഞ്ഞു.
" പശ്ചിമ ബംഗാളിലും പാർട്ടിക്ക് മുസ്‌ലിം സ്ഥാനാർഥികളുണ്ടായിരുന്നു. ഉത്തർ പ്രദേശിലേക്ക് ഇത്തവണ ഞങ്ങൾ കുറച്ച് പേരുകൾ നിർദേശിക്കുന്നുണ്ട്. മുസ്‌ലിം സമുദായത്തിൽ നിന്നും കൂടുതൽ പ്രാതിനിധ്യം വേണം. ഇതവരെ സമൂഹത്തിൽ മുന്നേറാൻ സഹായിക്കും." - അദ്ദേഹം തുടർന്നു.
മുസ്‌ലിം ജനസംഖ്യ 30 ശതമാനത്തിലേറെയുള്ള നൂറ് സീറ്റുകളും, 20 ശതമാനത്തിലേറെയുള്ള 140 സീറ്റുകളും 60 -70 ശതമാനം മുസ്‌ലിം ജനസംഖ്യയുള്ള 40 സീറ്റുകളും തങ്ങൾ കണ്ടെത്തിയിട്ടുണ്ടെന്ന് ജമാൽ സിദ്ദിഖി പറഞ്ഞു.
Summary : Field 'at least 20' Muslim candidates in UP, BJP's Minority Morcha urges central leadership